Le corps de cette deuise est vn Serpent qui
paroist sans vigueur & tout assoupi dans
sa cauerne, & durant la saison de l'hiuer sem-
ble estre sans venin mais suiuant l'Ame de
la deuize
Non de-sunt venena sed Torpent
L'Aplication de cette deuize est aysée a
faire aux hypocrites dont l'aparent
Modestie Cache toutes sorte de vices sous
sa froideur.
L'hypocrite Effronte soubs la faulce aparence,
d'vne froide & sainte prudence,
cache le noir venin qu'il couue dans son coeur,
comme vn serpent quy durant la froidure,
semble estre sans venin dans sa cauerne obscure,
mais quy reprend l'Esté sa mortelle vigueur,
De la deuotiion & de l'hypo-
crisie.
IL n'est rien de si Saint ny de si louable
que la vraye deuotion, mais il ny a rien
de si abominable deuant Dieu & deuant les
hommes que l'hypocrisie.
Ces deuots de profession quy montrent plus
de ferueur au dehors qu'ils n'en ont dans le
Coeur quy manquent de Charité & d'humili-
té, & quy se seruent des choses sainctes com-
me les Magiciens pour commettre leurs abo-
minations doiuent estre detestés de tout le
monde, & l'on en doit fuir la societé comme
celle des serpens quy ne sont pas sans ve-
nin l'hyver; Encor qu'il soit engourdy par
le froid
Non de-sunt Venena sed Torpent.